Maningon Pistar Do Hita Anak Simalungun

Assalamualaikum, Wm. Wb.

Horas…! Horas…! Horas…!

Naparlobei, diateitupa ma hubani naibata namambere hagoluhan hubani hita bei. Sonai homa hubani hita haganup na roh i jon, sai anjanah sangap-sangap ma hita das hu pudi ari.

I jon, i tanoh Simalungun on, domma maju. Jaman sonari on bahat do salian perkembangan na dong. Janah halak na pistar ma na boi mambaen goluh ni salih madear. Humbani ai, ase boi hita pistar maningon bahat do mambasa buku. Maningon rajin do homa marsikolah, sonai homa makkorjahon PR na ibere guru.

Jaman sonari on ro rayoh na do anak-anak manuntut ilmu. Dearan do bi sadea marguro-guro. Padahal anggo sadea pistar ro bahat na do boi ihorjahon. Janah ro dearni ma hagoluhanni haduan. Humbani aima ase porlu do tumang rajin-rajin marsikolah.  Songon uppasa ni halak simalungun

“Halambir ni sindamak, ikuhur dop ibolah.

Sonaha pe nini halak, ulang lupa marsikolah.”

Ibagas uppasa ai, age sondiha pangayob ni hasoman lao marguro-guro, na parlobei ma tong horjahon horja na madear. Ibagas ma ai makhorjahon PR na ibaen guru, ibagas ma ai mangurupi namatoras ni bei, pakon ibagas ma ai mambasa.

Namambaen jolma pistar, salah sada ma ai mambasa. Seng boi sasada jolma pistar anggo rayoh do ia mambasa. Halani ai, porlu do salian i biasahon namambasa on. Porlu ni ai ase boi mamppagok parbinotoh lao manghadapi hamajuon jaman sonarion. Maningon rajin do mambasa nian anak-anak sonarion. Maningon rajin do marlajar anak simalungun ase roh dearni simalungun ta on.

Anggo rayoh-rayoh do hita marlajar, na laho marsikkor do andohar. Tapi anggo rajin do hita marlajar, salih raja ma hita i tanoh simalungun on. Naima nini hata ni uppasa,

“Roba sipissarpissar, parsidingan ni leto.

Mardohar anggo pistar marsikkor anggo oto.”

Sonai ma porlu ni salian na marlajar on. Anggo lang hita marlajar, anggo hita pelang mamajuhon tanoh hatubuhon ta on, seng adong halak na legan na ra humbani ai. Anggo rayoh-rayoh do hita, salih babu ma akin hita i tanoh hatubuhan ta on.

Maningon malo-malo do homa hita manorih parubahan na adong i tanoh simalungun on. Halani gok do parubahan na lang sosok hubi adat ni simalungun. Halani ai, maningon rajin do hita marlajar, songon diha do satong-tongna ada ni simalungun. Aima nini ase ulang ikatahon lupa bona.

Nai pe nini hata ai haganupan, seng boi tarlaksana hapistaron ni halak simalungun anggo lang di dukung haganupan. Sai andohar ma mintor maju hita haganupan halak simalungun. Sai pistar-pistar ma hita anak-anak simalungun.

Na songon manutup hata on, dong sada uppasa namadear.

“Boras sabur-saburan, iboban ni pinggan pasu.  Horas hita ganupan, sai jumpahan pasu-pasu.” Sonai ma lobei.

Horas Simalungun. Horas… Horas… Horas…!

Assalamualaikum, Wm. Wb.